Fleischer's Hotel går inn att i VisitVoss – og Iselinn (29) inn i vertskapsrolle

Iselinn Tho Tønjum smakar no på vertskapsrolla ved ærverdige Fleischer's Hotel etter fleire år utanlands, spesielt i Alpane.

– Det er ei stor oppgåve, men veldig kjekt, seier Iselinn Tho Tønjum om arbeidet ved hotellet.

29-åringen er dotter til hotelleigar Erik Fleischer Tønjum og ei av sjette generasjonen i den store hotellfamilien. Sidan ho var ferdig med utdanninga i hotelleiing i fjor sommar, har ho arbeidd 100 prosent ved hotellet.Inntil vidare deler ho tida si mellom Voss og Italia, men hotellivet i vossabygda lokkar.

HISTORIE I VEGGENE: Iselinn Tho Tønjum er ei av sjette generasjonen i familien som engasjerer seg i hotelldrifta. Gry Bystøl i VisitVoss er glad for å få Fleischer's med på laget. Foto: Geir Geitle

At Iselinn er inne og set sitt preg på hotellet, er på langt nær den einaste endringa ved det historiske hotellet. Dei har også tilsett driftssjef, og går inn att i VisitVoss etter å ha stått utanfor destinasjonsselskapet i nokre år.

Både Fleischer's og Park

Det er fleire årsaker til at Fleischer's no går inn i VisitVoss. Mellom anna har dei behov for marknadsføring internasjonalt.

– VisitVoss har alltid vore underfinansiert. No vil me vera med å få destinasjonsselskapet opp og gå, og sjå om me kan påverka å få til ei finansering som gjer at VisitVoss fungerer betre, seier hotelleigar Erik Fleischer Tønjum.

Gry Bystøl, leiar i VisitVoss, er strålande nøgd med at Fleischer's er med att.

I tillegg til Fleischer's har også Park Hotell Vossevangen gått inn att i VisitVoss etter fleire år utanfor. Dermed er alle tre store sentrumshotella igjen medlemer i destinasjonsselskapet som skal trekkja turistar til bygda.

GOD SPIRIT: – At Iselinn og Fleischer's Hotel går inn att i VisitVoss, har mykje å seia for spiriten i reiselivet på Voss, seier Gry Bystøl (t.h.). Foto: Geir Geitle

– Det er utruleg kjekt at sentrumshotella på Voss er med. Dette har mykje å seia for spiriten til reiselivet på Voss, seier Gry Bystøl.

– Tilliten er tilbake

– Det blir lettare å få til felles aktivitetar og kampanjar. Mange har ynskt Fleischer's tilbake, seier leiaren i VisitVoss.

Fleischer's gjekk ut av VisitVoss for ni år sidan. Alette Hjelmeland som er marknadsdirektør ved hotellet og ektefellen til Erik, seier at det ikkje var noko ynske om å gå ut – men meir eit signal hotellet ville senda om at dei ikkje kjende seg sett eller verdsett.

– Me hadde fleire vanskelege saker med heradet og Vegvesenet, og Fleischer's fekk ikkje støtta som me hadde venta – og fortent. No har me god kommunikasjon med Gry Bystøl. Tilliten til destinasjonsselskapet er tilbake, seier Alette Hjelmeland.

– Viktig at me står saman

Sigbjørn Slåtten er ein av dei som stod bak oppkjøpet av Park Hotel Vossevangen sommaren 2021. Park melde seg inn i VisitVoss rett etter overtakinga.

– Me ynskjer å delta i fellesskapet, både ved å bidra og å få noko igjen. Det er viktig at me står saman, og kjekt at Fleischer's også blir med, seier Slåtten. Han legg til:

– Eg trur det er ein tendens til at folk på Voss ser at samarbeid gjer oss sterkare, slik at me kan løfta fram bygda i lag.

Iselinn Tho Tønjum har også stor tru på fellessatsinga. Likevel må utgiftene forsvarast.

– Høge straumprisar og andre stigande utgifter gjer at det er kritisk at kvar krone me bruker, gjev inntekter. Samstundes ser eg dette som ei langsiktig investering. Det er ikkje sikkert me ser resultata med éin gong, seier ho.

ÆRVERDIG HOTELL: Gry Bystøl (t.v.) i VisitVoss er glad for å ha fått Fleischer's Hotel og Iselinn Tho Tønjum med att på laget.Foto: Geir Geitle

På Fleischer's Hotel har det skjedd fleire endringar siste året. For snart to år sidan gjekk dei ut og lyste etter hotellsjef, og Kenneth Storheim er tilsett som driftssjef ved hotellet.

Når i tillegg Iselinn Tho Tønjum er med og dreg lasset, avlastar det Erik Fleischer Tønjum og Alette Hjelmeland.

– Kombinasjonen er heilt topp, seier Alette.

Litt friare kvardag

Hotellekteparet har vore gjennom årelange konfliktar om veg, eigedom og inngangsparti, i tillegg til covid som råka reiselivsbransjen spesielt hardt.

– Det har vore ein knallhard periode for heile familien. Me har fått det eine slaget i trynet etter det andre, seier Alette Hjelmeland som for tida jobbar fulltid frå heimekontor i Spania.

– Men det har gått fint med oss. Heldigvis. Det me ynskte var ein friare kvardag, der me kan lausriva oss litt frå den daglege drifta. Viktigast for meg var å få tid til å vareta minstemann i ein utfordrende fase av livet, seier ei tilfreds Alette via PC-skjermen frå Spania.

Erik Fleischer Tønjum seier at det ikkje er lett å finna arbeidskraft til hotellet. Før låg dei på 80 tilsette som utførte om lag 60 årsverk – no ligg dei på 40 tilsette. Og dei treng fleire.

– Me er framleis ikkje fulltalige etter koronaen, så eg er ikkje arbeidsledig enno, slår hotelleigaren fast.

– Me er nøydde å få eit fullt bemanna hotell att, men det er tøft å finna folk generelt etter covid. Heile bransjen tapte mange dyktige medarbeidarar til andre bransjar. Det slit reiselivet med overalt.

Løft med gondolbanen

Eit stort ljospunkt er at gondolbanen tek Fleischer's Hotel til nye høgder:

POSITIVT FOR FLEISCHER'S: Gondolbanen er med og løftar Fleischer's til nye høgder med grøn turisme. Foto: Geir Geitle

Fleischer's er eldste skihotellet i landet, og kombinasjonen med grøn turisme der gjester kjem med tog og bur på hotellet og spaserer til gondolbanen rett utanfor døra, passar som hand i hanske til hotellet sin filosofi.

– Voss som berekraftig reisemål er langt mer tiltrekkjande for oss enn masseturismen det vart lagt opp til for tre–fire år sidan.

Fleischer’s er stolt over å vera sertifisert miljøfyrtårn. Miljømerket fekk dei fyrste gongen i 2013.

– Me er opptekne av berekraft og arbeider systematisk med å avgrensa fotavtrykka våre i naturen. Den friske lufta, det reine vatnet og den storslåtte naturen danna i si tid grunnlaget for dei fyrste turistane som kom til Voss. Dette grunnlaget er me plikta til å ta vare på, seier Alette Hjelmeland.

– Og for fyrste gong på fleire år har me igjen after-ski på Fleischer's og godt med gjester! Alt som hjelper til å skaffa oss gjester er med på å halda oppe drifta ved denne nasjonalskatten av ein bygning. På den måten blir gondolen nesten berekraftig han også!

– Ein livsstil, ingen vanleg jobb

Iselinn Tho Tønjum deler no vertskapsrolla med 82-årige Gerd Ohnstad Tønjum, bestemora til Iselinn som stadig stikk innom.

VOSS OG ITALIA: Iselinn Tho Tønjum (t.v.) med Gry Bystøl. Iselinn deler tida si mellom Fleischer's Hotel på Voss og besøk til Italia og kjærasten Jordan Pession som har same jobben på hotell som Iselinn. Foto: Geir Geitle

– Ho har alltid drøymt om at eg skulle arbeida på hotellet, heilt frå eg var lita, seier Iselinn og smiler.

Iselinn tok til som sommarhjelp for mange år sidan, og har no mange administrative oppgåver som ho tek hand om frå kontoret.

– Iselinn er fabelaktig å ha på hotellet. Og ho er ein god stand-in for Gerd, Erik og meg, rosar Alette Hjelmeland.

Iselinn kjem med nye idear og ny teknologi, og arbeider no med å innføra nytt hotellsystem som lettar bookinga for gjestene.

Iselinn fartar også rundt på hotellet, og då Hordaland er der, hoppar ho til i baren og ekspederer ein gjest som ynskjer forfriskingar.

ALLSIDIG HOTELLKVINNE: Iselinn Tho Tønjum stikk innom resepsjonen med viktig informasjon for dagen, og tek gjerne eit tak både i baren og restauranten. Foto: Geir Geitle

Per i dag pendlar ho mellom Voss og Cervinia i Italia til kjærasten Jordan Pession.

Pappa og hotelleigar Erik Fleischer Tønjum seier han er glad for å ha Iselinn ved hotellet så lenge ho er der, men kjenner seg ikkje sikker på kva ho til slutt landar ned på.

Men Iselinn ser ut til å stortrivast i rolla ho har hatt dei siste månadene.

– Å jobba her, er ein livsstil, og ikkje nokon vanleg jobb. Eg får energi av jobben, seier den driftige hotellkvinna.